Dé Máirt, bhuail an tUachtarán le hionadaithe an Fhóraim Dhomhanda um Fhrithbhulaíocht 2019.
Beidh an Fóram i mbun oibre i mBaile Átha Cliath i mí an Mheithimh 2019, agus tiocfaidh sé i ndiaidh an chéad Fhóraim Dhomhanda um Fhrithbhulaíocht a bhí ar siúl i Stockholm i mí Bealtaine 2017. Is é aidhm an Fhóraim tuiscint a mhéadú ar an mbulaíocht, ar an gciapadh, ar an leithcheal agus ar leaganacha eile de ghníomhartha míthrócaireacha agus foréigneacha i measc páistí agus na hóige.
Tá an tUachtarán Ó hUigínn tar éis labhairt amach in aghaidh na bulaíochta roimhe seo, agus dúirt sé go mbíonn tionchar millteach ag an bhforéigean agus ag an mbulaíocht ar shaol daoine agus go gceiltear a ndínit orthu. Le linn a chuairteanna ar scoileanna ar fud na tíre, luaigh an tUachtarán an tionchar millteach is féidir a bheith ag an mbulaíocht ar shaol duine.
